Wikipedia scale of justice3ayan mga DDS, inyo na ngayon ang Pilipinas. Si VP Leni napakadali na lang sigurong tanggalin. Tapos si Panot kukulungin na dahil sa Dengvaxia. Wala nang husgadong aayaw sa kaso ni De Lima dahil puwede silang ikuwaranto ni Calida. Ayan makakaganti na kayo sa wakas. Sa mga elitista. Magiging pare-pareho at pantay-pantay na ang Pilipino. Siyempre may mayaman pa at mahirap. Pero wala na iyong sobrang galing mag-Ingles. Wala na iyong mga pa-rule-of-rule-of-law diyan. Lahat ng desisyon manggaling kay Tatay Digong. Tulad noong panahon ni Mahoma at Lapu-Lapu.

Walang Korte Suprema noon. Walang Katoliko. Walang mga Unibersidad na puro demonstrasyon. Walang mga borloloy na batas na sobrang komplikado. Walang dilawan na druglord. Walang adik. Pero wala pang Facebook at Globe. Huwag kayong matakot, hindi tayo babalik nang todo-todo ano. Pero iyong mga nagmamagaling ngayon hindi na pupuwede. Lahat na parang iisang barangay. Kung ano iyong kaya ng Presidenteng kantahin, iyon lang ang tugtog. Rakrakan ni Baste OK din. Mga librong Western na nakakalason sa isip ng kabataan, tatanggalin. Kailangan ba ng China iyon?

Sila Tulfo, Acosta, Calida, Topacio at Gadon, mapupunta lahat sa Senado. Mabuti pa sila kaysa kay Bam Aquino na bakla. Kung anu-ano ang gustong gawing pakulo para sa technology development. Hindi kailangan ng Pilipino iyan kapag nandiyan ang China. Kailangan nila nang tapag-alaga. Parang mga Kuya at Ate na magbibigay sa kanila ng payo, para hindi sila lumayas sa daan ni Tatay. Pagkat alam ni Tatay Digong ang tamang daan. Walang tuwid na daan sa mga isla, puro baluktot. Kaya huwag kayong umasa sa anumang pangako. Mag-adjust kayo. Para ito sa ikabubuti ng lahat.

Mga journalist. Isa-isahin talaga sila. Bastos sila. Meron bang mga anak na sumasagot sa Tatay? Western countries siguro, mga masasamang ugali. Nasa kanila ang droga, Dengvaxia at democracy. Mga bagay na pampagulo sa lipunan. Unti-unti silang makikibagay o mawawala. Tulad ng dilawan.  Happy-happy na lahat sa wakas. Simple at komportable ang magiging buhay. Huwag magtanong. Basta alam ni Tatay Digong iyan. Supreme Court? Bakit may drug lists naman sa may barangay. Paano kung mamarkahan ka? Problema mo iyon! Para ka bang Serenong di marunong makisama?

Mga seaman, alam naman siguro ninyo ang mga lumang kuwento. Sa mga mapanganib na lugar sa dagat o sa may ilog, may mga babaeng nakaistambay at umaakit sa mga seaman. Mga Sereno ito. Mermaid din ang tawag sa kanila, halimbawa doon sa pelikulang Pirates of the Carribean Nr. 4. Huwag makinig sa kanilang kanta at baka maligaw pa kayo, mga Pilipino! Huwag magpa-akit! Huwag maniwalang sila mga babaylan ng katutubong Pilipinas! Lalake lang ang namumuno noon!  Inakupo mga DDS atbp., sana ganyang kadali ang mundo ano? Gising sa panaginip..

Irineo B. R. Salazar
ika-12 ng Marso 2018, München